Sajak Tien Rostini
Sajak

Dangdanggula Tahajud

Aduh Gusti Anu Nyangking Asih
Duh Pangeran Nu Ngawasa Tresna
nu wanoh jeung kereteg hate
rumaos abdi mahluk
nu teu wasa nyingkiran asih
nyimbeuh seuneu katresna
nu geus kadung hurung
iklas ditumbal ku nyawa
jeung tinimbang tebih ti nu dipiasih
pajauh jeung nu heman


Nuturkeun

Majar anjeun rek maturan
sanggeus kuring ditinggalkeun
majar anjeun rek miheman
mun kuring keur sedih kingkin

Majar arek ngabeberah
mun cipanon kuring bedah
majar anjeun arek haat
mun cipanon teu saat-saat

Buktina geuning ayeuna
anjeun mulang ka pangkonan
Illahi robbi Alloh subhanahuwata'ala
subhanahuwata'ala

Anjeun mulang miheulaan
patuturun na rangkulan
Nu Maha Suci
bral anjeun mulang ti leula, pileuleuyan

Hiji waktu kuring bakal
pinasti geusan nuturkeun
ngahiji di kalanggengan
tumut ka Illahi robbi
duriat pegat teu sapat, pileuleuyan

Bogor, 2009