sagala

Kembang-kembang malati kiwari geus laligar
Ngarangrangan saacan usumna
Boa, bangbara nu kungsi nyeuseup seungitna diri kuring
Geus hiber kabawa angin
Ah, kuring mah hiji kembang nu pasrah kana titis tulis
Nu teu bisa mungkir kana kadar
Bangbara mihape katresna kuring nu kungsi paheut dina ati
ulah rek diumbar jeung diiburkeun
kuring rek mulang ngaleupaskeun sagara cinta jeung cimata

Telekin

{ 2 September 2009 @ 15:06 } · { Sajak }
{ Tags: Sajak } · { Leave a Comment }

Kalimah Anjeun teu kedal diucap
Aya kalimah nu nyelek dina dada
Tapi kuring teu kembat pikeun ngucap
Aya harewos nu niiskeun batin
Tapi kuring teu bisa ngedalkeunnana
Ukur lampah nu karasa nurihan ieu kalbu
Teuing naon nu kudu dilakonan
Sedeng ajal geus aya dina tenggek
Kuring ukur sumegruk dina handapeun samoja
Nyaksen nu nalkinkeun layon diurugan taneuh beureum
Sedeng kuring kudu nandangan siksaan
Nu moal eureun dina itungan mangsa
Pajaratan jadi saksi pamungkas carita

Gupay Ijroil

{ 2 September 2009 @ 15:05 } · { Sajak }
{ Tags: Sajak } · { Leave a Comment }

Lampu-lampu peteng atra nyaang nu ngalalakon
Galur kahirupan lir ibarat jalan nu teu manggih tungtung
Sedeng Ijroil gugupay na tungtung jajantung
Teuing saha nu bakal miheulaan
Sakabehna paembung-embung digero
Geuning dunya teh geus rek surup
Marengan Ijroil muru mangsa
Teuing naon nu baris kasorang jaga
Sedeng dunya geus sengserang padung

Pareng Nyorangan

{ 2 September 2009 @ 15:04 } · { Sajak }
{ Tags: Sajak } · { Leave a Comment }

Pareng ningal kingkilaban
ngolenyay dina wiati
najan mung sakolepatan
geuning patri kana ati
sapertos asih abdi
nu hurung di jero kalbu
manteng mung ka salira
taya nu tiasa nyilih
salamina ruhruy hurung lelentaban

Pareng nyeueung kiceup bentang
kumelip luhur buruan
najan mung sakolenyayan
geuning ngusik kana ati
sapertos geugeut abdi
nu hurung lebah jajantung
manteng mung ka salira
taya deungeun geusan ganti
salawasna nyengcelak taya reureuhna

Pareng nyawang teuteup bulan
nu ngempur di langit tebih
geuning siga nu gugupay
sanaos enya patebih
teu kinten dalit matri
jajantung teu kinten ratug
emut ka salira engkang
nu ilang duka ka mendi
palangsiang boa moal deui mulang

Kahariwang

{ 31 August 2009 @ 19:54 } · { Sajak }
{ Tags: Sajak } · { Leave a Comment }

Nyawang mangsa nu bakal datang
Bet ringrang, sarebu pananya weleh teu kapanggih jawabna
Bet hariwang, sarebu harepan weleh teu kaudag kalangkangna

Na iraha urang bakal ngarasa ludeung ?
Jiga neuteup panon poe meletek nu nyumiratkeun sumanget
Jiga neuteup bulan nu ngajangjikeun kaendahan
Ieu kalbu misono kateger tiktakna waktu..

Gol

{ 25 August 2009 @ 17:41 } · { Barakatak }
{ Tags: banyol, Barakatak } · { Leave a Comment }

Mang Sobri : “Gol! Gol! Persib meunang euy!”
Usin : “Bapa, naon ari gol teh ?”
Mang Sobri : “Gol teh asup, Jang!”
Semah : “Punten!” Jang ari si Bapa aya ?”
Usin : “Aya. Sok we gol!”

Basa Kolot

{ 25 August 2009 @ 17:32 } · { Basa }
{ Tags: Basa } · { Leave a Comment }

Bapa : Usro, geura sambeang ka dituh. Heg wulu heula sing bener. Balik ti masigit, tancebkeun kelebet di jalan. Bisi rek daang, centong jeung lumurna beresihan heula !”
Anak : Teuing ah, teu ngarti..

sambeang = sholat
wulu = abdas
kelebet = bandera
daang = neda
lumur = gelas

Di Camahan

{ 25 August 2009 @ 17:21 } · { Basa }
{ Tags: Basa, Camahan } · { Leave a Comment }

Dijaman kiwari asa can nyaksian jalma dicamahan. Boro-boro dicamahan, kecapna oge can kadenge aya anu ngedalkeun. Kuring sok nyerengeh, lamun inget kana eta kecap teh. Padahal ngadenge jeung nyaho hartina teh, basa diuk di bangku SMP, 12 taun ka tukang..

Kieu caritana mah :

Saban poe Kemis di sakola teh sok diayakeun “Penca Silat”, salah sahiji pelajaran ekstrakulikuler. Dilaksanakeunnana bada lohor nepikeun ka asar. Sakali mangsa, guru silat teu ngajar.. Ceuk guru nu lain mah nyandak budakna ka rumah sakit cenah. Keur ngeusian kakosongan waktu, Kapala Sakola nunjuk kuring kudu mingpin ngapalkeun jurus-jurus silat.

Keur hut het ngapalkeun jurus, si Mia ujug-ujug nyakakak terus ngagorowok. “Hey…hey…hey…, barudak eureun. Tempo aing boga jurus anyar…” pokna. Rengkenek we mraktekkeun jurusna. Duka jurus nanahaon, da teu puguh aturan, ngababibuta ka ditu kadieu.

Barudak teu burung eak-eakan, nyaleungseurikeun. Sawareh nyunutan, nyumangetan supaya terus. Diseuneuan teh si Mia lir hanyang ngigel manggih kendang, kalah beuki motah, malah mah make dibarengan ku jungkir jumpalik, najong, ngadengkak jeung ngageol sagala.

Panon lalaki mah mani malalotot kawas lebareun ngiceup. Molotot teh lain muji atawa helok, ieu mah ku lantaran anderok jeung baju si Mia sok nyingkab, nembongkeun katepel dina dadana jeung bungkus mutiarana, da manehna teu make pangsi.

“Tah kitu jurus anyar teh. Sok ayeuna saha anu wani maju ka hareup. Opik, sia wani ?” ceuk si Mia bari guram-gerem kawas maung. Teuteupannana seukeut, buringas beda ti sasari.
“Naha bet teu wani, awewe mah moal aya anu jago…”walon kuring.
“Naon, sangeunahna ngahina kaom awewe teh. Maju siah !”
“Eahhh…Awewe mah euweuh anu jago,” bari ngalengkah, terus ngareret ka barudak anu geus ngariung, ngurilingan. “Tingali barudak, awewe mah ku nu kieu mah sieuneun,” sambung kuring, terus ngadeukeutan si Mia bari leungeun api-api arek ngalaan beubeur jeung kancing calana. Maksud teh rek disingsieunan.
“Naon, aing mah teu sieun ku nu kitu…” si Mia nyirintil, habek we teu antaparah deui najong bobogaan kuring.

Saha lalaki-na anu kuat ditajong kohkolna. Mun henteu katurelengan oge, pastina panonna bakal burial-buncelik. Na angenna bakal aya anu ngaganjel, ngabagel. Rek usik hese, rek ngomong oge kacida eungapna. Nu karasa ngan nyeri nu moal aya duana, awak jadi teu bisa walakaya.

Keur ungkug-ungkugan nahan kanyeri, si Mia nyampeurkeun, terus grek beuheung kuring dihompet. Eungap-eungap oge dikitu mah kuring ngahenen, ngarasakeun empukna gunung kembar manehna. Najan aya anu ngahiliwir bau teu ngeunah tina lebah kelekna, pikiran teh, cadu moal manggih deui kasempetan emas model kieu mah.
“Mia…Mia…tong dikitu ! Ngareunaheun dikitu mah…” murid awewe raeng.

Dibejaan kitu teh hompetanana dibuntang-banting, terus dilesotkeun. Kuring nu geus beakkeun tanaga, ukur sadrah basa ngajongjolong terus nyungkur kana jukut, nonggeng. Rek cengkat, si Mia mindo najong. Dug! Goak. Tajonganana mener pisan dina liang cungcurungan. “Tah eta mah bonusna…” pokna.

Jep! sora barudak anu eak-eakan ngadadak euweuh. Nu kadenge ukur guram-geremna si Mia anu sakapeung nyakakak.
“Nanaonan maneh teh, Mia ? Awewe-awewe galak…” sora awewe teugeug.
Ret ka lebah sora. Gebeg, paingan barudak repeh, geuning nu cumarita teh Ibu Tata, guru agama. Gigireunana aya Pak Kapala Sakola Pa Dudung jeung Bu Lala.
“Mia, maneh ka kantor ayeuna keneh !” ceuk Kapala Sakola.
Si Mia kalah ngagakgak. Jungkir dua kali terus hut-het, rerengkenekan deui. Kabeh murid langsung mundur. Pa Kapala Sakola jeung Pa Dudung rikat newak. Dicekelan teh si Mia kalah adug-adugan, hayang leupas.
Kuring colohok, kakara eungeuh manehna teh kasurupan. Paingan asa jadi galak. Da sapopoena mah someah darehdeh, hade budi hade basa…

Si Mia pada ngarejengan, beuki lila beuki motah. Sakapeung ngocoblak, sagala dipenta jeung disebutkeun.
“Camahan…Camahan,” ceuk Pa Kapala Sakola. “Punten Bu Tatat, camahan supados teu ngamuk teuing. Ku istri mah sok manjur !”

Bener we sanggeus dicamahan mah si Mia teh teu ngamuk. Ngan murid lalaki jadi reang menta dicamahan.
Heueuh saha lalakina anu embung dicamahan, komo ku nu geulis mah sigana pahayang-hayang. Da geuning dicamahan teh beungeut jalma nu kasurupan diusap, tapi samemehna dampal leungeun anu arek ngusap kudu diantelkeun atawa nyagap heula laranganana.

*dicutat tina Barakatak Mangle Mei 2009 karangan Mirna Utami*

Kakawihan dina Kaulinan Barudak

{ 21 August 2009 @ 07:03 } · { Kaulinan Barudak }
{ Tags: Kaulinan Barudak, kawih } · { Comments (1) }

Kakawihan asal kecap na tina kawih anu hartina sarua jeung tembang, jadi kakawihan hartina tetembangan. Kakawihan biasana dikawihkeun ku barudak bari arulin, kumargi eta kakawihan sering disebutkeun oge kaulinan barudak. Kakawihan dina kaulinan barudak teh loba, tiap kawih biasana ngawakilan tiap kaulinan.

Lamun barudak arulin dina tangkal, kawihna “Eundeuk-eundeukan”. Ngawihna bari ngeundeuk-ngeundeuk tangkal, dikawihkeun babarengan. Mun rek ucing-ucingan, kawihna “Cing ciripit”. Ngawihna bari ngariung, narangtung. Nu ngariungna aya opat tepi ka lima urang. Nu kapilih kudu ngasongkeun dampal leungeun. Dampal leungeun kenca diasongkeun ka tengah riungan. Kabeh barudak kudu ngantelkeun curuk anu katuhu. Curukna diantelkeun kana dampal leungeun tea. Terus barudak ngawih “Cing ciripit”. Lamun kawihna beak, curuk diangkat. Dampal leungeun dikeupeulkeun. Mun aya curuk anu kakeupeul, eta nu eleh jadi ucing. Mun curuk anu kakeupeul leuwih ti hiji, barudak ngawih deui.

Judul kawih anu sejenna loba keneh, diantarana “Ayang-ayang gung”, “Oray-orayan”, “Tokecang” jeung “Cing cangkeling”.

Cing Ciripit

Cing ciripit,
tulang bajing kacapit,
kacapit ku bulu pare seuseukeutna,
jol pa dalang mawa wayang,
jrek-jrek nong.

Pring kicimpring,
beling piring katincak,
katincak ku suku kenca,
suku kenca kud ingkudan,
jol pa dokter diubaran,
jos-jos plong.

Cing Cangkeling

Cing cangkeling
manuk cingkleung cindeten
plos ka kolong
Bapa Satar buleneng….!


Ayang-ayang Gung

Ayang-ayang gung
Gung goongna rame
Menak Ki Mas Tanu
Nu jadi wadana

Naha maneh kitu
Tukang olo-olo
Loba anu giruk
Ruket jeung kompeni

Niat jadi pangkat
Katon kagorengan
Nganteur kangjeng dalem
Lempa lempi lempong
Ngadu pipi jeung nu ompong

sumber: www.yudinugraha.co.cc


Tokecang

Tokecang tokecang bala gendir tosblong
Angeun kacang sapependil kosong

Aya listrik di masigit meuni caang katingalna
Aya istri jangkung alit karangan dina pipina

Tokecang tokecang bala gendir tosblong
Angeun kacang angeun kacang sapependil kosong

Sumber: www.organisasi.org/tokecang


Eundeuk-eundeukan

Eundeuk-eundeukan
Taraju bawang
Kalima cipe, jae ulae
Sangkayo
Cabok cinde mende
Dodomoyo

Endeuk-eundeukan
Jamparing pegat talina
Aleut-aleutan
Nu kawin euweuh walina

Euleung euy euleun barudak urang ka jami
embung euy embung sieun badak nu kamari
Euweuh euy euweuh
Geus dibedil ku si Sedet
Detong det detong
Si Sedet kari sapotong

Jung jae
Balakatanjung jae
Mangsoyi godong malati, riri
Riri nyandung ka putra dalem
Tumenggung Bandung
Bandung tipung polongpong
Saunda saendo poho
Poho tadi lalajo teu mawa simbut, butut!

Eundeuk-eundeukan Lagoni

Eundeuk-eundeukan lagoni
Meunang peucang sahiji
Leupas deui ku Nini
Beunang deui ku Aki
Eundeuk-eundeukan cangkuang
Bale Bandung Paseban
Meunang peucang Pa Ujang
Leupas deui ku Akang

Jaleuleu

Jaleuleu ja
Tulak tujaeman gog
Seureuh leuweung bay
Jambe kolot bug
Ucing katinggang songsong
Ngek!

Kali-kali Koneng

Kali-kali koneng
Naha koneng aing di kali
Piubareun budak
Naon budakna
Hulu lisung
Naon pangasuhna
Jurig beureum dikukuncung

Kalongking

Kalongking-kalongking
Bapa sia hudang ngising
Dibura ku madu kucing
Madu kucing meunang maling

Kalongking-kalongking
Bapa sia utah ngising
Beak samak beak samping
Teu cageur waktu sapeuting

Margaluyu

Bang kalima-lima gobang bang
Bangkong di tengah sawah wah
Wahey tukang bajigur gur
Guru sakola desa sa
Saban poe ngajar jar
Jarum paranti ngaput put
Puteri nu gareulis lis
Lisung kadua halu lu
Luhur kapal udara ra
Ragrag di Jakarta ta
Taun opat hiji ji
Haji rek ka mekah kah
Kahar tujuh rebu bu
Buah meunang ngala la
Lauk meunang nyobek bek
Beker meunang muter-ter
Terus ka Cipaten pen
Pena gagang kalam lam
Lampu eujeung damar mar
Mari kueh hoho ho
Hotel pamandanga ngan
Ngantos kanjeng dalem lem
Lempa lempi lempong
Ngadu pipi jeung nu ompong!

Punten

Punten mangga
Ari ga, gatot kaca
Ari ca, cau ambon
Ari bon, bonteng asak
Ari sak, sakit perut
Ari rut, rujak asem
Ari sem, sempal-sempil
Ari pil, pilem rame
Ari me, meja makan
Ari kan, kantong kosong
Ari song, songsong lampu
Ari pu, puak-paok
Ari wok, wok candewok

Ole-ole Ogong

Ole-ole ogong
Melak cabe di Tarogong
Dihakan ku embe ompong
Diteang kari sapotong

Au-au eheng
Beuleum cau tutung geheng
Embe-embe domba
Anak sapi tutunggalan

Ema-ema weya
Si Sahi kabuhulan
Hayang geura diinuman
Embe-embe doma
Anak sapi tutunggalan

Ema-ema weya
Si Sahi pupundakan
Ku baturna ditumbukan…

Rat-rat Gurisat

Rat-rat gurisat
Nini ingrat paeh diselap
Tiselap kana kuciat
Dibura ku laja tuhur
Laja tuhur meunang ngunun
Meunang ngunung tujuh taun
Kadalapan diburakeun
Nyeh prot, nyeh prot, nyeh prot….

Roro Monyoro

Roro manyoro
Manyoro manjangan ngidul
Anak sia jadi ratu
Diketukan dikenongan
Turunan apung
Karunya ka anak sia

Tik-tik Tolektak

Tik-tik tolektak
Ari tak, taktak bareuh
Ari reuh, reuhak cina
Ari na, naya gengong
Ari gong, gongseng panas
Ari nas, nasi baso
Ari so, sorangan bae yeuh…

Trang-trang Kolentrang

Trang-trang kolentrang
Si Londok paeh nundutan
Mesat gobang kabuyutan
Tikusruk kana durukan

Tuktubrung

Tuktubrung tali tanjung
Papagan nyamplung
Pada leutik pada sempung
Patulangtung patungtung brung…

Sumber: www.manuskripkesunyian.wordpress.com


Ucang-ucang Angge

Ucang ucang angge
mulung muncang ka parangge
digogog ku anjing gede
anjing gede nu Pa Lebe
ari gog gog cungungung

Tongtolang Nangka

Tongtolang nangka
kawinan bapa
poe salasa
teu beja-beja
aduh aduh si bapa
teungteuingeun ka ema
bapa mah suka suka
jeung nu ngora

Tat tit tut

Tat tit tut
daun kanyere (kaliki)
saha nu hitut budak awewe (lalaki)
dibawa kasaung butut
balikna ngaburusut

Ambil-ambilan

Ambil-ambilan turuktuk hayam samantu
saha nu di ambil
kami mah budak pahatu
purah nutu purah ngejo
purah ngasakan baligo
purah tunggu bale gede
nyerieun sukuna kacugak ku kaliage
aya ubarna urat gunting sampurage
tiguling nyocolan dage

Oray-orayan

Oray orayan
luar leor mapay sawah
tong ka sawah
parena keur sedeng beukah
Oray-orayan
laur leor mapay leuwi
tang ka leuwi
di leuwi loba nu mandi
Oray-orayan
oray naon, orya bungka, bungka naon, bungka laut
laut naon, laut dipa, dipa naon,…dipandeuriiiii…

Perepet Jengkol

Perepet jengkol jajahean
kadempet kohkol jejeretean

Sumber: www.riksanagara.multiply.com