gx

Lebah dinya,
di parapatan eta
aya kembang nu midangdam
nganti nu ngalanglangan
karunya ukur impian

Lebah dinya,
di jalan liliwatan
aya asih anu nganti
aya karep nu miharep
hanjakal geuning nogencang

Lebah dinya,
aya bangbara nu ngahelaran
hanjakal teu saati satujuan
kapaksa pegat sapisan…

Kebon Kolot, 29 Oktober 2009
Komentar
Gerentes kamelang
Filed under: sajak by kisatria — Tinggalkan komentar
23 Mei 2010
(Lain gerentes mun geus di wakcakeun)

Bari ngalimba Abah nyarios
“kahayang mah embung papisah jeung hidep teh
sok tara reugreug..
sok aya kamelang…”

bari ngaheruk abdi oge ngagerentes..
“saha atuh nu hoyong papisah
saha incuna nu hoyong pajauh..
abah tong nyarios kitu..
nalangsa…
melang…
mun abah kitu teh..
Abah mah sing damang
Abah mah sing jagjag…”

Mangsa harita nu kedal ukur cimata
cimata kamelang
nu di simbutan ku semu marahmay..
da mungguh hate mah asa di turihan

Kebon Kolot, 25 Oktober 2009
Dina kamelang jeung katineung ka Aki Pangebon
Komentar
Linglung
Filed under: sajak by kisatria — Tinggalkan komentar
23 Mei 2010
Gunung mana nu kudu dijugjug, kuring bingung
Sagara mana nu kudu disorang, euweuh dina implengan
Langit mendi nu kudu disungsi, leungit tina pamikir
Ilang musna tina sawangan

Nu ngabebela ayeuna mah geus pareum
Nu hurung teh kiwari mah ukur ruhakna
Nyesakeun hawa nyongkab nu rohaka
Ninggalkeun panas nu ngarerab kana jero dada

Mun seug ieu suku ngajugjug gunung, ieu kuring arek milu
Mun tea mah ieu raga rek nyorang sagara, ieu awak rek tumamprak
Mun cenah diri rek nyungsi langit, sageuy teuing kuring cicing

Kebon kolot, 24 Oktober 2009
dina tungtung kabingung
Komentar
Sesebutan ka jelema
Filed under: sisindiran by kisatria — Tinggalkan komentar
21 Februari 2010

Kaliki gunung pipisan
Di handapna loba teki
Lalaki nu kolot pisan
Disebutna aki-aki

Digawe ukur nyeuseuhan
Bari ngala kini-kini
Awewe nu kolot pisan
Disebutna nini-nini

Badak handapeun kalapa
Depa na tumpukan batu
Budak teu indung teu bapa
Disebut budak pahatu

Ditonggoh melak kaliki
Dirambatan akar seureuh
Ari kabogoh lalaki
Disebutna teh beubeureuh

Ditonggoh melak kanyere
Daunna beak ku embe
Ari kabogoh awewe
Disebutna teh bebende

Kaliki nu di Manglayang
Dibawa ka Rancakole
Ari bijil bulu mayang
Sami jeung baleg tampele

Rek lalajo ngadu kuda
Peutingna terus ngaronda
Ari nu disebut duda
Mun di awewe mah randa

Kamarina meuli bedog
Isukna mah meuli patlot
Hartina kokolot begog
Niru kalakuan kolot

Karung butut na karanjang
Dipiceuna ka Cililin
Ari nu disebut bujang
Lalaki nu nacan kawin

Tong rusuh lamun digawe
Malah mah kudu disiplin
Anu disebut cawene
Awewe nu acan kawin
Komentar
Majar maneh…
Filed under: sajak by kisatria — Tinggalkan komentar
20 Februari 2010
Majar maneh kumaha jodona
Majar maneh kumaha jadina
Majar maneh moal maksa duriat
Majar maneh rek manjangkeun baraya
Geuning ukur na lambe

basa urang pegat duriat
anjeun bet malik ngewa
tuang ibu siga nu bendu
tuang rama bangun nu wera
ari kitu mah teu karna Allah ta’ala…
Harianeun..

Dina lolongkrang lamunan…

Cikopak, 12 Oktober 2009
Komentar
Mustika nu Leungit
Filed under: sajak by kisatria — Tinggalkan komentar
20 Februari 2010

Ki Satria metakeun pangawasa
mentangkeun jamparing tina gondewa
gandang…
gagah…
pertentang…
rep sidakep mapatkeun jampe jeung jangjawokan
bur mubyar cahya kinasihan
hurung marengan mesatna jamparing

gabres..
jamparing niruk jajantung
mubus kana iga burung

Nyi Putri ngadangheuak
ngahegak siga tos nanjak
aya geutah nu ngabayabah
aya inghak bangun ogo
aya koceak dengek dina rehe combrek
aya harewos nu haroshos
aya nu awor dina galura kasono
aya nu lalayaran dina sagara tresna
aya nu bedah ku tanaga bedas
aya ..
..mustika nu leungit duka kamana

Dina wanci geus ngagayuh ka janari….

Kebon Kolot, 04 Oktober 2009
Komentar
Duh Gusti…
Filed under: sajak by kisatria — Tinggalkan komentar
20 Februari 2010

Gusti…
Tatu ieu tacan lita, gudawang keneh
Cimata ieu tacan saat, ngalembereh keneh

teu kalis ku sumilir angin lirih
teu kagembang ku sora nu ngawirahma
aya amarah nu beuki rongkah
genjlong deui
…oyag deui beuki rosa

Duh Gusti…
Tina tatu renung rasa kaduhung
Tina cimata ieu kedalna katunggara

Rumaos gusti… rumaos
diri tebih ti salira,
…raket jeung dosa

Aduh Gusti…
Ampun gusti…
hampura abdi.

Kebon Kolot, 2 Oktober 2009
Komentar
Kasuat-suat
Filed under: sajak by kisatria — Tinggalkan komentar
20 Februari 2010
Baheula…
Didinya urang gogonjakan, jeung kaheman
Didinya urang silih simbeuh, ku kadeudeuh
Didinya urang silih baledog, ku kasono
Didinya urang jangji pasini, dina ati
Didinya urang ngedalkeun subaya, tanda cinta

Ayeuna…
Urang patepung, nya didinya
Dina dada awor sagala rasa, ngagalura
Handapeun katapang,jadi saksina
Nu teu weleh satia, tugur ka urang
Mulangkeun panineungan, alam ka tukang
Ka mangsa baheula, nu ayeuna jadi kasuat-suat…

“Oleh-oleh” reuni akbar 26 September 2009

Kebon Kolot, 27 September 2009
Komentar
Kadeudeuh ka nu Reureuh..
Filed under: sajak by kisatria — Tinggalkan komentar
20 Februari 2010

Geus tilem hiji pamuntangan
nu natrat iwal kaheman
Geus muguran hiji tunggul karahayuan,
nu nyesa iwal panineungan
Geus ilang hiji komara,
nu hibar ukur dangiangna..

Seungit malati ngandung ciri aya nu nganti
Ligarna samboja medalna tangara mukana pangbagea

nu nganti taman firdaus nu suci
nu ngabageakeun para malaikat di sawarga..

Bral…
wilujeng angkat..
kaasih salira hamo ka silih…
katineung salira tanwande nganteng
Parigi, tungtung Ramadhan 1430 H
Komentar
Taya nu apal
Filed under: sajak by kisatria — Tinggalkan komentar
20 Februari 2010
Kamari si dadap,
poe ayeuna si waru,
isukan…
…taya nu apal

boa isukan dulur urang,
boa isukan kolot urang,
boa isukan…
…urang sorangan…
taya nu apal

Kamari jagjag,
poe ayeuna gering,
isukan…
…taya nu apal

boa isukan gering parna,
boa isukan jagjag waringkas,
boa isukan…
…disampeur ajal…
taya nu apal

Kamari bungah,
poe ayeuna tunggara,
isukan…
…taya nu apal

boa isukan tambah nalangsa,
boa isukan meunang nugraha,
boa isukan..
…biheung…
taya nu apal

Kebon Kolot, tengah September 2009
(dina tungtung panineungan ka nu geus mulang)